ليلى وقيس / محمد ابو زيد الأسيوطي

 

ليلى وقيس / محمد ابو زيد الأسيوطي  

لمي يا ليلي

الشعر من فوق الضفوف

النيل مجاش

فمبدهاش

 تتذنبي

وتذنبي

روحك علي باب الحروف

تستني قيس

وقيس مبطل شعر

بقي زي الالوف

متباع بلاش

غشاش

كما كل الأحبة

 حياته صعبة

مش لاقي تمن القوت

وعايش بالشروط

بيموت

ويصحي ألف مرة

مستني قطر الحب

ف محطة وقوف

والانتظار

صعب وممل

نفسه في مرة يبدر

الأكوان بفل

يغني

غنوه الأمل 

اللي لسه مغنهاش

متعذبيش نفسك

علي عصفور وطار

العش كان له دار

ونار الغش

حرقت له الجناح

بطل يغني للصباح

حتي الندي

 فوق الشجر

ناضح جراح

ومتساليش مين السبب

يا ليلي مش ناقص تعب

حتي الغضب جوايا

بقي رافض يثور

والقلب مكسور

والعجب

لسه بيترجي اللسان

وهواكي بيلف المكان

وان كان

هواكي شحاته أو إحسان

بلاش

متجرجريش قلبي لعتاب

الباب

قفلته من زمن

مين اللي كان

فينا التمن

مين اللي كان

شلال غرام

مين اللي باع العشق

ف طريق الحرام

صعب الكلام 

علي قلب مجروح

زلزلة أن يحس الطعن

ولا يقبله

من اغلي ناس

وأنا قلبي حساس

رقيق

كان صعب يقبل

أو يطيق

منك أهانه

وأنتي بأمانة مخلتيش

للحب شيء

وأنا مش بري

لأني سبيتك للضياع

وقبلت غيري

في جنتك يفرد شراع

حتي ضميري

فترة نام

ورضيت بعادك والخصام

أيام ومرت

والكلام فيها يجرح

وأنا مش لاقي لي

فيكي مطرح

بطرح عناقيد

من بعيد

بسال عليكي

لجل بس اطمئن

والظن بئس الظن

منه بستعيذ

مانا لو عزيز

عليكي ولا

ليا لو حفنه تراب

في أرضك المتباعة

لديول الكلاب

أنا كنت أحارب

كل أوكار العقارب

بس المغارب

جوه منك

رافضه تتخلق نهار

هيه عقيمة

ولا واخده ألف مانع

بطلت تنجب شباب

صديقني جوه

مني ميت سؤال

لسه محتاج

 للجواب

وأنتي لو عملالي قيمة

أو كريمة

في المشاعر

زي ما كنتي زمان

كنتي حسيتي

 إني شاعر

صعب يقبل

أنه يدبل أو يوافق

شمسه ترحل

أو يسلم للغروب

كل يوم

 أنا كنت بذنب

بس برجع لك وأتوب

والقلوب

ملك اللي خالق

صدقيني رغم

مر الجوع بحارب

للمبادئ والعقيدة

بس بتفاجيء تملي

إني لسه ع الحديدة

صدتيني

ودتيني خلف شمسك 

اللي غابت

رغم إني تملي ثابت

مش بضيع مش ببيع

وفي حبي صادق

ايوه عاشق

للسحاب

نفسي أطير فوق السما

نفسي أضمك

بس حاسس

لسه فيكي باغتراب

هوه ده وقت الحساب

لو تحبي

قربي وتعالي قلبي

لسه فاتح ألف باب

باب مودة وباب لشدة

حضني مفروش لك مخدة

نامي فيا

لسه محتاج لك قويا

مش ضعيفة

لسه محتاجلك

شقيا مش سخيفة

مستحيل هتكوني

جيفة

يقطعوا فيكي الكلاب

لسه محتاج إني أشوفك

تفرضي

ع الكون حروفك

تبهريني

تملي عيني تكوني ليلي

اللي حبتها زمان

لسه محتاج لك تضمي

تبقي أختي بنتي أمي

جوة دمي

 نهر فايض م الحنان

صدقيني وحشني قمحك

عيشك وملحك

والنهارده جاي بصارحك

والعتاب

بين الأحبة

نفسي أشوفك

ليا كعبة

تنصري الإنسان

وأطوفك

كل يوم ولا ألف مرة

نفسي أشوفك

غالية حرة

تبقي درة الزمان

متقوليش تاني ظروفك

نفسي نفسي وياما نفسي

انصريني مرة وحدة

وامسحي جوايا يأسي

بيا حسي

قبل ما يفوت الآوان

لسه بفتح لك ببان

الحب تاني

والأغاني

فيا طارحة

افتحي للحلم فرحة

نفسي أغمض عيني واصحي

التقيكي

زي ما كنتي زمان

تبقي ليلي وابقي قيس

نطرد الأباليس

نطهر المكان

نزرع الحب اللي غايب

والحبايب

بالأماني يزغردوا

والطيور المهاجرة

بالمحبة يغردوا

يضربوا بيكي المثال

كل شيء أنا بعبدوا

قلبي شلال للغرام

وعنيكي والله

هي بابي ع الحياة

حتي الإله لما أقوله

بعبدك

يرضي عليا

يقولي هيه

أم كل الدنيا دية

لما تعبدها حلال

هيه فعلا جنتي

هيه الربيع

في الأرض

 لو مجرد فرض

حتى أو احتمال

إنها ممكن تضيع

قول علي الدنيا السلام

 

****

رابط للقصيدة فديو

علي اليوت يوب

 

http://www.youtube.com/watch?v=8tP8fge1cMI

 

 

 

Share

أكتب تعليقا